المدونة قيد التطوير

mohamed ismael salama

عيب شعري

أضف تعليق الأحد, مايو 21, 2017 , كتبها محمد إسماعيل سلامه
قد عابَ شَعريَ أنَّ قلبيَ قائلُه
ويَعيبُ قلبيَ أنَّ صدريَ عائلُه
ويَعيبُ نَفسيَ أنها سِجني أنا
ويَعيبُني في الحُبّ أنّيَ سائلُه

***
محمد إسماعيل سلامه


عمار الشريعي .. ورقة يوميات صغيره

أضف تعليق السبت, أبريل 22, 2017 , كتبها محمد إسماعيل سلامه
الموسيقى من الحاجات اللي بعشقها من صغري، أفتكر موسيقى رأفت الهجان بالذات مش لحن المقدمه المشهورة، إنما التترات خلال المسلسل مكنتش مجرد موسيقى بالنسبة ليا، البيانو اللي كان في الخلفية مع كل مشهد مشحون بالمشاعر كان متعه ليا أكتر من المشهد نفسه، كنت قاعد مع راجل كبير في السن وحكيتله عن الموسيقى دي واني بقعد ادام المسلسل استنى في البداية والنهايه علشان انقل اسم الراجل اللي لحنها، وقعدت اتكلم ساعتين عن الراجل اللي لحن الموسيقى دي وانه مش انسان عادي واني بنسى المشاهد والمسلسل والدنيا بحالها وانا قاعد مستني البيانو اللي في الخلفيه ده يشتغل ..

الراجل ده كان زي ناس كتير بيفضل يسمعني وعليه نظرة إعجاب باللي بقوله دايما، وزي ناس كتير كان يقوللي اني بقول كلام اكبر من سني بكتير، اهتمامه باللي بناقشه فيه هو سبب اني كنت بحب اقعد معاه ساعات لأني مكنتش بلاقي حد اقعد معاه اساسا ولا يهتم بأي حاجه بقولها في البيت اللي مكنش بالنسبة ليا بيت ، ما علينا ، المهم .. سمعني للآخر ، ولقيته بيقوللي : انت تعرف اللي بتتكلم عليه ده موسيقار عظيم اسمه عمار الشريعي ، فضل يكلمني عنه شوية ولقيته بيقوللي : بس انت تعرف انه اعمي !!
وهنا .. دخلت في حالة من الحالات اللي عمري ما هنساها في حياتي وانا بحاول اترجم وافسر لنفسي بعقلية الطفل اللي مكنش طفل أبدا .. كمية العطاء الإلهي لحد فينا لما ياخد منه حاجه ويديله حاجات .. أنا كان أقرب تصور ليا ساعتها ان الراجل ده بيكدب .. وكل ما أحاول أصدق الحقيقة دي عن عمار الشريعي .. كان ساعة ما يدق البيانو بتاعه في المسلسل أفتكر نص الكوباية المليان وأحس أد إيه الراجل ده بيشوف أكتر من اي حد ..
لما بسمع البيانو ده النهارده مش بعرف امسك نفسي من العياط .. مش عشان الموسيقى ، انما أنا كان نفسي أحتفظ بعقلية الطفل ده، اللي كان دايما برغم كل ظروفه اللي بجد كانت صعبه وخدت منه كتير أوي.. لكن بيبص دايما .. لنص الكوباية المليان.

عجايب

أضف تعليق الخميس, مارس 30, 2017 , كتبها محمد إسماعيل سلامه
عجايب
ياللي في الهوى دايب
وقلبك خالي لا محبوب ولا حابب
بتحكمك الظروف لكن
خيالك في الجمال سايب
وتقسى قد ما تقسى
غريب .. مجروح .. ومش عاجب
لكن ترجع
تسيب الدنيا للدنيا
وتروق في جزء من الثانيه
تصاحب ليل ما يتصاحب
وتسند ع الهموم تكتب
ولا حاقد
ولا كاره
ولا فاكر ولا غاضب
وتكتب وقت ما تكتب
 وقلبك في الهوى دايب !!
أضف تعليق الجمعة, مارس 17, 2017 , كتبها محمد إسماعيل سلامه
يا ليل بلا أحباب .. يا حزن مبيخلصش
 قلبي بعته جواب .. ورجعلي مبينطقش!
أضف تعليق الأحد, فبراير 12, 2017 , كتبها محمد إسماعيل سلامه
إلى الزاهدين في حبي، سأتصدق به على من هم أحوج مني إلى حياةٍ لم أعشها.

28 يناير 2011

أضف تعليق السبت, يناير 28, 2017 , كتبها محمد إسماعيل سلامه

في مثل هذه الساعه، كنت يوما في خضم معركه انتهت بنتيجه لم تستمر الا لأيام معدوده قبل أن يغرر بنا وهي أن هذا البلد تنفس قليلا من طهر صدور الشباب المهضوم وبالأخص جيل الثمانينات، فعشنا قليلا بلا شرطه، بلا قمع، بلا سرقه، بلا جريمه .. ثورة ٢٥ يناير هي كل ساعه طاهره تنفستها انا والملايين من امثالي الذين ما التقيتهم الا في هذه الاوقات من ٢٥ يناير الى ١١ فبراير حيث تنحى العرص الصغير ، ثم أبى معرصي هذا البلد إلا أن ينصبوا العرص الكبير، فقتل من قتل، وسجن من سجن، وأصبحت الثوره كلمه سخريه في برامج التوك شو، وعلى السنة اطفال ليسوا بأطفال، لكنها ستظل ذكرى طاهره في صدور من تنفسوها بصدق يوما ما، وعلقوا عليها أحلامهم المهضومه ...

 إلى كل شاب قضى طفولته مع الاتاري ابو دراع ولم تتشوه طفولته بفيلم للسبكي والى كل فتاه دقت ساعاتها للحب فلم تتجرد له خلف سور الا من نظرة، نحن لا نزال اخر جيل يملك اصولا للجمال في هذا البلد.

جَفَّتْ رَياحِيني

أضف تعليق السبت, ديسمبر 10, 2016 , كتبها محمد إسماعيل سلامه
رُوحـي سَـجـين لا الزَّمـان زَمَـانـه ... كـلا ولا هــذا الـمـقــام مــقــامــي
ما مَـرَّ مـن يـوم عـلـى حُـلـم ٍفـنـا .....إلا وذقـــتُ مَـــــرارةَ الأيـــــــــام ِ
وَثَـبَ الـزَّمانُ مُغَـبـّرًا فـي إثــره .......عُمري ، فضيَّعَ صَفحة الأحـلام ِ
يالَشَّـبـاب إذا تـداعـى والـصـبــا ........هُـزمَ الطًّموحُ ونُـكِّـسَتْ أعلامي
يا ساكناً والـرّوحُ بين جوانحي ..........وَتـرٌ بـه شَــوقٌ إلــى الأنــغـــام ِ
هـذي لـيـال ٍ لا تُـبــدّدُ لـوعـتــي .......والشمسُ تشرقُ لا تُحيل ظلامي
جَـفـَّت رياحيني وأقـفـَرَت الـرُّبى ......والـنَـيِّـراتُ أضـاعهـن غـمـامـي


(من أشعاري)

محمد إسماعيل سلامه

غريبٌ ساءَهُ زَمَنٌ غَريبُ (بصوتي)

أضف تعليق الاثنين, أكتوبر 24, 2016 , كتبها محمد إسماعيل سلامه
غير مقتنع بالمرة بمستوى إلقائي لأشعاري .. ألقيتها تحت ضغط بعض الأصدقاء .. ودائما ما أقول أن الإلقاء موهبه بحد ذاتها تدعم صاحبها كثيرا إن كان شاعرا أو تحبطه. على كلٍ .. هذه تجارب اولى أشارككم إياها. تحيتي
محمد إسماعيل سلامه



23-10-2016

عندي طيف

أضف تعليق السبت, أكتوبر 22, 2016 , كتبها محمد إسماعيل سلامه
عندي طيف
جاي معاه ييجي ألف ضيف
عيد سعيد
عيد سعيد
ع السلالم ، فيه نصيح
( يا عيال ، خالكم المجنون ده فوق ، أوعوا حد يكلمه )
جاي زيارة بقلب مليان بالجروح
جاي وماشي مش هطول
شوفت رسمي ع الحيطان
لسه موجود من زمان
يعني لسه فيا روح
واقفه مربوطه ف مزاد
تشكي للي في السفوح
رخصها بين العباد
دمعتين لو نزلوا قابل بالقلم
اعمي ليا عين وسيبلي أختها
ابكي بيها اللي اتظلم
والطفوله والرجولة والشباب اللي انهزم
فردة الجزمة القديمه والشراب اللي اتخرم
والمدرس لما كان بيعدي ويقول ارحموه
مخه حلو ، إفهموه
طالع الأول كمان
هوا فين الحج يعني ولاموآخذه ، فين ابوه
لا دا مات ..
لا قاصدكم انه يعني ولاموآخذه
إترحم !!
......
المدرس ده قابلني من يومين
قاله ياه ، انت فينك من سنين
بصلي شوية وحس . انى كاتم دمعتين
قاللي يابني الصبر حلو
ياريتني كان عندي بنات
خد سيجارة ...
........
شعر
محمد إسماعيل سلامه
22 أكتوبر 2012

أنا مش هكره ترابك

أضف تعليق الجمعة, أكتوبر 07, 2016 , كتبها محمد إسماعيل سلامه
أنا مش هكره ترابك
مهما الكلاب تعوي
في الأرض م الناحيتين
لابو تنظيم واغتيال
ولا باشا لوا مُتَعال
ملعون أبو الاتنين
(من أشعاري)